25.5.2020

Curdes, Rojava, comunalisme e nasionalisme

Cosa de curdes es denova entre moldur, cuando islamiste Turcia ia ataca contra curdes de Siria en anio ultima. Soldatos de Turcia es an ala oji.

Curdes de Siria ia constitui sua propre rejion seminondependente en la parte norde este de Siria. La rena autocrata e cruel de Siria ofisial no gusta lo. E no ance Turcia.

Rojava es un caso positiva en mar cultural e fecal de Asia sude ueste. En Rojava es en usa un model statal, cual es construida de basa a alta. Lo es un tipo de ibride de praticas de un democratia parlamental e democratia direta. Ala on segue tridivide de potia: potia de legi, potia de esecuta e potia de judi es nondependente de lunlotra. Egalia de sesos es en la rejion regardada, car a organos diferente governal esiste un  cuota sesal de 40 persento. Ance grupos etnical ave sua propre cuotas. On ave cuatro linguas ofisial. Parte de soldatos de Rojava es femes.

On pote nomi e on ia nomi ante aora ideolojia promoveda par curdes de Siria comunalisme.

En alga loca uebal e finsce on alega, ce comunalisme regarda nasionalisme como un venena. An con estas curdes de Asia sude ueste a multe vasta grado promove a sua popla o propre nasional-stato o a la min los vole gania un autonomia nasional entre paises de esta rejion masosa. Estas umanas pensa nasional.

Final me raconta sur la democratia direta usada en Rojava. En la nivel local abitores asembla a asemblas deside-fante. Estas fa desides sur cosas local. Los ance eleje delegadas a seguente nivel. Asemblas sur seguente nivel fa desides e eleje delegadas a seguente nivel. Etc. Asta on es sur un nivel la plu alta, do on fa desides sur cosas de tota Rojava.

Me dise, ce a la min en Rojava es un prinsipe valida political de visinia, cual es importante sur nivel de pensa en La uni european.

Me amira ance forma de la direta democratia usada en Rojava.

...
PS. 22.6.2020: E mesma en lingua finsce: Kurdit, Rojava, kommunalismi ja nationalismi, osa 1, e: Kurdit, Rojava, kommunalismi ja nationalismi, osa 2.

21.5.2020

Ci nesesa un sensura?

Mera tirania nesesa ul sensura.

testo en un bandera entre protestas antisensural en junio de anio 2009 en Germania

15.5.2020

A me ensenias la plu importante de Biblia

A me ensenias la plu importante de Biblia cristian es seguentes cuatro, cual cadas on trova en La atesta nova:

Jesus ia ensenia, ce lo es plu difisil a un person rica asede a la rena de Dio ca camel tra anelo de ago. Disiplos ia seguente demanda de Jesus: "Alora esce no cualce person pote es salvada?" Jesus ia responde a los: "Cual es nonposible a umanas, es posible a Dio." Si un umana crede, ce el pote muta se a moral, alora el malpersepi.

Un ensenia de Jesus en la predica montal: A cada dia sufisi sua propre ansi.

Un ensenia de Jesus en jardin de Getsemane, cuando on ia veni per prisoni el e loa disiplo ia colpa de lace de arciprete loa orea a via. Jesus ia sani la orea e dise: "Ci prende un spada, el afoca a un spada." Longo mea comprende Jesus ia ensenia asi, ce el e ela ensenias on no debe sperde o defende par armas.

La ensenia de Jesus en la predica montal: Un umana debe trata otras como el espera otra umanas trata el. Car un umana es, cual el es, alora lo es difisil vive rigorosa longo esta regula. Ma esta ideal ia ave a cualce caso sua afeta a cultur. Me crede, ce no plu un burocratia protestante o stato sosial ia ta nase de cultur, en cual lo ia ta manca un conose de esta regula.

...
PS. 22.6.2020: E mesma en lingua finsce: Minulle tärkeimmät Raamatun opetukset.

13.5.2020

Istoria de mea vive spirital

Me ia presenta en anios ultima un tende per nonrelijiosia. E cuando la situa ia grandi en estate de anio 2019, me ia debe pensa ance la entera de Jesus en desenio de 30.

Lo es a me multe difisil relata en tal manera, ce Jesus no ia ta revive. Lo es multe difisil pensa, ce tempora "comun caseta de polvo" ia ta putri e destrui como tempora "caseta comunde polvo" de otra umanas.

Me raconta en seguente un tota raconta de mea vive spirital:

Me ia nase en anio 1970. Mea jenitores ia parteni a La eglesa evanjelial lutheran ofisial de Finland, ma los no ia es a alte grado credores.

Jenitores de mea padre ia es en alga manera credores. Me ia abita con mea jenitores e peti-frate prima en mesma construida nonfisada con los asta lo, cuando me ia ave 8 anios.

Como un adolesente me a la min de prinsipe ia regarda cristianisme como un bon cosa, ma consernante lo me ia es a alga grado noncorajosa. Me ance ia vade a corta scola eglesal e finsce "rippikoulu", an si un anio pos mea cameradas scolal, car me ia a ante oblida enscrive per lo.

Me ia comensa ave entre tempo pensas multe prejudosa. Ance mea propre pecosia ia angusa me. De esta me ia es salvada en anio 1993, cuando me ia ave 22 anios, par dedui de la cosa fundal de cristianisme. Esta cosafundal ia es seguente: Umana es salvada, cuando el abandona tota de sua propre posiblias e sua propre atentas per sufisi a Dio e vive moral bon vive, e a mesma tempo fundi sua relata a Dio sola a la labora espial de Cristo. La spirito sancte ia veni en me. Corta diseda esta veria es: "Dio esije de umana no."

Mea dedui ia aspeta es a acel grado contra la manera natural de pensa de umana, ce me ia esperia, ce lo es un labora de Dio. Spesial, cuando a lo ia inere ance un afeta fortial de Dio. A me lo ia pare stonante, ce Dio vera esiste, e lo no mera es un caso de relijio. "Me dise!"

A mesma tempo, cuando me ia dedui la cosa, me ance ia comensa opina, ce no esiste (o va esiste) la tormenta eterna en enferno. Mea opina nova sur tormenta en enferno ia deriva de dotor de teolojia T. P. Virkkunen, de ci libros relijial psicolojial me ia leje a ante e de ci me ia oteni sabe, ce longo instrui la plu comun de La atesta nova algunes asede a sielo e otras cade a defeta. O no esiste e va esiste la eterna tormenta en enferno.

Dedui de la cosa fundal de cristianisme e leges de La uni european ia posibli un proba de bires diferente.

Dedui de fundal cosa de cristianisme ia dona a me ance un "spina dorsal" filosofial. Me vera ia intende vade realia presedente.

En anio 1995 me ia comensa vade a Parocia libre de Vantaa, cual parteni a La eglesa La eglesa libre de Finland es tal eglesa libre o en relata a la potia publica un congrega nondependente, cual es en sua pratica de relijio e crede en media de La eglesa evanjelial lutheran e ofisial de Finland e Helluntaiherätys. Helluntaiherätys es un congrega pentecostaliste. O como un mea sore-en-crede ia-alora dise: "Nos es como pentecostalistes ma plu razonante."

An si longo crede de La eglesa libre de Finland un batiza no es nesesada, me ia solisita, ce on ta batiza me. E me ia es batizada.

Me ance ia ave relatadas pentecostaliste, ma me ia a alga grado evita Helluntaiherätys e ance La eglesa evanjelial lutheran ofisial de Finland. Alora La eglesa libre de Finland ia conveni a me multe bon. En comensa.

Me ia ave tal vista semilibraliste sur Biblia, ce lo no es parola de Dio, ma lo conteni parola de Dio. Vera esta no ia es mesma como la vista de La eglesa libre de Finland, cual es plu conservaliste.

Un otra mea sore-en-crede un ves ia dise sur me, ce me ta es un agnostica, si me no ia ta dedui la cosa fundal de cristianisme.

Lo entre tempo ia comensa irita me, ce de plataforma de predica on frecuente ia refere a la tormenta eterna en enferno. En ajunta me ia es iritada par causa de otra razonas. Pos ce me ia es dui desenio como un membro de La eglesa libre de Finland, me ia resinia de la eglesa.

En me ia ante aora nase un nonpardona a Dio, car Dio a ante ia dona a me tan poca. Ma me a cualce caso no ia vole abandona Cristo.

Pos un tempo longa, en primavera de anio 2016 me a cualce caso ia veni a resulta, ce de prinsipe on pote pensa la labora espial de Cristo sola como un ipotese laboral. Me sinifia lo, ce pos lo no nesesada es un Dio atante, ma lo pote sola es un caso de un fenomeno psicolojial e bon-fante. Me ia comensa nomi mea disposa nova strumentalisme.

En estate de anio 2019 me ia atenta abandona un nesesa adota a la labora espial de Cristo e abri en loca de lo a la universa. E esta ia funsiona. Me ia oteni la spirito sancte. Alora me ia proba un automatia de mea alma consernante la cosa, e la cosa ia funsiona de prinsipe ance sin abri a la universa.

A pos en la autono a me lo ia veni en mente, ce un nesesa adota a la labora espial de Cristo es un media la plu secur per oteni la spirito sancte.

Me no presenta la cosa como un fato nonrefutable, ma sola cosa, par cual Dio aida un umana, es la labora espial de Cristo, o alga como lo.

Importante probable ance es un prende de vive sufisinte casua.

...
PS. 22.6.2020: E mesma en lingua finsce: Hengellisen elämäni historia, kun nyt on kerran joulukin.

6.5.2020

Mea pensas sur sosialisme, promove laboriste, Marx e marxisme

En la tempo, cuando la industri ia nase, con lo ia nase ance la clase de laborores. A ante acel popla laboral, cual ia a ante esiste, ia es sperdeda, ma aora los ia es asemblada a fabricerias e a mesma distritos de urbe.

Con capitalisme ance ia veni la esplota traeda par capitalisme. E par lo e defetos traeda par la industri ia nase longo tempo ance la promove laboriste. Nos pote nomi lo ideolojia de sosialisme.

Alga sosialistes inisial ia crede, ce cuando on representa bon program per boni la sosia, alora tota de umanas razonante comensa ata per lo.

Un person german nomida Karl Marx (1818-1883) no ia acorda. En la sosia ia esiste potias forte, cual ia ata contra programes reformal de esta tipo. Estas no ta abandona sua vantajes sin batalias. Mera un revolui ta pote aida laborores. E mera par ata juntada laborores ia pote espera a alga dia liberi. Beneficas on pote defende efetosa mera juntada.

Marx ia regarda aceles sosialistes, ci ia presede el, nonpraticalistes, e el ia nomi estas sosialistes utopiste. El mesma ia crede, ce el ante aora ia pone sosialisme sur sua pedes. El ia vole fundi sua propre ideolojia de sosialisme sur fatos persepable.

Marx ia opina, ce un critica de relijio es un pre-esije per un critica de la sosia.

Otra de obras la plu conoseda de Marx es La declara comuniste, cual el ia scrive con sua colaboror Friedrich Engels, ia es publicida en 1848. Otra es un serie obral masosa en grandia La capital, de cual volum ultima ia es publicida pos mori de Marx.

Marx ia scrive ance un cuantia grande de otra libros e libretas programal.

Libralistes no spesial en sentenio de 1900 ia aproba tal reformis, cual ia vade a tro longa. Par causa de esta la promove marxiste e laboriste ia susede en asende a un sujeto major. En ajunta de sosialistes marxiste ia esiste en acel tempo per esemplo sosialistes anarciste.

On dise, ce an si Marx en sua produi plu inisial ia regarda un revolui violente como un pre-esije nesesada, alora el a cualce caso plu tarda ta ia converti a acel pensa, ce on no nesesada nesesa un revolui, ma un program reformal pote es esecutada entre la democratia burjes par reformis gradal.

Multes a cualce caso ia relata a Marx como un profeta nonerante, e pos loa mori ia nase un tipo de sistem de dogmas marxiste.

En anio 1899 a cualce caso ia es publicida un obra Die Voraussetzungen des Sozialismus und die Aufgaben der Sozialdemokratie (traduida: "Pre-esijes de sosialisme e taxes de democratia sosial") de Eduard Bernstein, teoriste e politiciste german e sosial-democrata. Bernstein ia es nom la plu grande de revisa de marxisme. En sua libro Bernstein ia critica e marxisme e Marx mesma. El ia promove un prosimi siential per funda de reformis sosial. El ia pone marxisme denova sur loa pedes par fundi lo sur fatos persepable. La om ia es an plu marxiste ca Marx, cuando el an ia abandona la babela sur dialetica.

Bernstein ia es fundor de un marxisme reformiste, cual no ia promove un revolui violente.

Cuando en La uni soviet pos la gera mundal prima on ia resta pos la talon ferin de la marxisme-leninisme o comunisme vulgar-marxiste e totaliste e dogmosa (cual orijinal ia es un parte de la promove sosial-democrata), alora en multe otra paises a ramo xef ia es öa sosial-democratia bernsteiniste e reformiste. Pos la gera mundal du esta sosial-democratisme ia vive sua eda oro.

Karl Marx mesma ia descrive se: "Me sola sabe, ce me no es marxiste." Comuniste autocratias en parte ia susi la reputa de Marx, e lo es un mal acaso. Me ia oia, ce un jenera joven a cualce caso pote a alga grado relata a Marx sin la istoria xocante de autocratias comuniste como un supracarga nonjusta.

Marx ia promove libria de laborores, e autocratias comuniste ia viole sua vista de mundo.

Me pensa, ce sosial-democratisme reformiste ia demostra sua funsionalia. Lo ia demostra, ce entre democratia par reformis gradal on pote reformi la sosia a plu bon dirije, de la persepi de laborores. Cuando Karl Marx ia odia tota moralisme an con lo, ce el ia senti un coleri par causa de mal trata e mal state sosial de laborores, alora en sosial-democratisme ia apare un judi plu forte moral.

Cuando capitalisme no es entre sosial-democratisme suvertida en tota, alora serta on debe concista democratia sempre denova. A veses va esiste potias forte e contra-labororal, cual reali sua portavoses a parlamentos nasional. An con lo me regarda la promove reformiste e laboriste plu bon ca cualce alternativa a lo.

An si en profondia de mea cor me cuasi vera ta vole es anarciste. Anarcistes vole fini capitalisme asta fondo e longo lo ance stato en tota, car lo esiste (longo la ideolojia anarciste) mera per beneficas de vantajidas, cual persones ia crea lo a ante.

Ma me mesma no multe pote identifia a anarcisme. Entre istoria de umanas on an nunca ia es confirmada, ce bonstate de majoria grande de popla pote nase en otra via ca un formula: sosial-democratisme + esiste de stato e democratia + economia de mercato.

Anarcisme no ave un resoma brava de carera. Me no pote fida a imaje de futur ofreda par lo, an si me senti un atrae a lo.

...
PS. 22.6.2020: E mesma en lingua finsce: Ajatuksiani sosialismista, työväenliikkeestä, Marxista ja marxilaisuudesta.

1.5.2020

Sur un bevida idromel o sima

Idromel es un bevida fada par fermenta. Vicinges antica ia bevi idromel fada de miel. Vicinges ia fabrica du tipos de idromel: plu nonalcolosa tipo e tipo, cual ance femes ensinta ia pote bevi.

Alora, idromel es un bevida vea e tradisional, cual on ia bevi en Paises norde, incluinte Finland, an si bevida plu o min simil on ia bevi en alga otra paises e rejiones en Europa entre istoria.

Un varia finsce de idromel – nomida sima – corente on jeneral fabrica de talias de limon e zucar. Jeneral lo no conteni a alte grado de alcol.

Finsces bevi sima en dias de san Walpurga – en prima de maio, e en sera de lo.

I PS.:

Asi tu vide, como en lingua finsce spasis sinifia (idea a esta PS ia veni de banda de cartunes de Pertti Jarla):

juhannussima teemukissa
= idromel de mediaestate en tas de te

Sinifia de esta difere de seguente: 

Juhan nussima Teemu-kissa
= gato Timoteus copulada par Johannes

II PS. Articles sur sima o idromel en Vicipedia en multe linguas:

en finsce: Sima
en svensce: Mjöd
en engles: Sima (mead)
en engles: Mead
en german: Met

III PS. Me ia compra e bevi acel idromel (juhannussima). Parola Juhannussimaa en imaje es parola en caso de ojeto – nomida "partitiivi" en lingua finsce – de sustantivo juhannussima, cual es la forma fundal. Partitiivi espresa, ce un aveni es en media e no completida, ma lo es un caso de prosede.